I Saved The King                                           © Iain H Scott

On the slopes o’ rugged Ruberslaw

Frae the wee toon o’ Rule, a’ hail

Where the Bowset Burn joins Rule Witter

And flows ti Teviotdale

A’ came frae a land o’ giants

Nae force could make us bend

Ti tame the beast for a royal feast

Ma hert, n’ hand ti lend

Now granted lands would be ma prize

Frae Philiphaugh ti Jed

But regal thenks a’ needed none

For him ma bluid a’d shed

Till age condemned ma aching limbs

Wi Douglas on Halidon Hill

And wi ma dug, n’ a ‘Lockerbie Lick’

Ma loyal bluid did spill

I Saved The King

I Saved The King

In the ancient woods o’ Caledon

Ti save King Bruce’s loyal throne

I’m William o’ Rule

I turned the bull

When the beacons blaze for Redeswire

On the Carter Bar

N’ “Out wi the sword” ti Sclaterford

Wi Scotts n’ Kerrs ana’

There’ll be Turnbulls on Ancrum Moor

Frae Barnhills ti Normandy

Ti avenge the Deidmans Haugh

N’ the Auld Enemy

So if you should unearth ma banes

Among Bedrule heidstanes

Or interred on Denholm Green

Where Leyden sung ma fame

You’ll ken its me be the size n’ girth

N’ back ti Rule ye’ll bring

The muckle banes o’ Turn-e-bull, n’ shout

I saved the King

I turned the bull

In the ancient woods o’ Caledon

Ti save King Bruce’s loyal throne

I’m William o’ Rule

N’ I turned the bull